沖繩大自然的美味盛宴即開生蠔＋海鮮拼盤＋炙燒波士頓龍蝦＋阿古豬

（Presented by Royal Park Hotel）

Dining娜上星期曾到訪過帝都酒店，發覺每家餐廳都增添咗唔同嘅沖繩特產美食同飲品。原來7至9月係沖繩夏季，當地好多特產正好進入當造季節，所以酒店特別將各種特產加入Menu內，其中重點推介有 2+2 café 嘅「仲夏沖繩鮮味．海鮮自助晚餐」！豐富美食陣容包括：即開生蠔、炙燒波士頓龍蝦、海鮮拼盤、魚生刺身、阿古豬海鮮清湯火鍋、雪鹽薄燒M5和牛、海葡萄鮑魚沙律、風味冷麵等，以及沖繩主題甜品，誓要以各種沖繩美食踢走暑熱悶氣！

即開生蠔＋海鮮拼盤＋魚生刺身＋炙燒波士頓龍蝦

當你好掛住那霸泊港魚市場裡面各種即日鮮捕、鮮甜肥美且價錢超抵嘅海鮮水產時，Mastu （等等）！呢度亦搜羅咗多款嚟自日本，以至環球嘅時令海鮮拼盤，包括有即開生蠔、松葉蟹腳、半殼青口、藍青口、凍蝦等。除咗冰鎮冷盤外，仲有沖繩常見嘅鹽烤做法。現場亦有炙燒波士頓龍蝦，配以菠蘿蛋黃汁或黑糖味噌汁，兩款一甜一鹹嘅沖繩特產調味醬汁。

「炙燒波士頓龍蝦」龍蝦肉質鮮嫩彈牙，煎香後蘸上沖繩菠蘿蛋黃汁或者黑糖味噌汁，再用火炭燒至金黃微焦，大幅提升龍蝦肉嘅鮮味，Umami縈繞舌尖上久久不散。

必食冷熱首選：阿古豬+和牛配宮古島雪鹽

沖繩人出名鍾意食豬，甚至去到「除咗叫聲以外全部都食」嘅熱愛程度，而阿古豬（Agu）係當地原生黑毛豬特有品種，由於肉質甘甜、爽嫩味美、零腥羶味，據說膽固醇含量只係一般豬肉嘅25%，加上數量稀少供應有限，所以又有「夢幻之豬」嘅美譽。雖然燉煮係當地最常見嘅烹調手法，但為咗令大家食到「夢幻之豬」最原本嘅真實滋味，今次自助餐分別以涼拌同火鍋，兩種一冷一熱又最簡單直接嘅烹調方式，完美呈現出阿古豬嘅味道同質感。

「蒜泥阿古豬」將阿古豬成幅蒸熟後再切成薄片，唔單止保留咗肉質鮮嫩甘甜嘅特質，更令人感受到油脂喺口裡面化開嘅獨特口感！除直接食用外，亦可伴以生蒜、熟蒜同花椒混調而成嘅風味醬汁佐食，食落甘而不膩、更添惹味。

「沖繩阿古豬海鮮清湯火鍋」選用阿古豬最肥美嘅五花肉部位，再加入藍青口、鮮蝦等海鮮同雜菜煮成高湯涮熟，營造出五花肉入口即化，兼瀰漫住層次豐富嘅海洋鹹鮮味，將湯汁濃度同鮮度一併昇華，絕對不容錯過！

「沖繩雪鹽薄燒M5和牛」特選上乘M5和牛放喺鐵板上，即場燒至七成熟，霜花同肉汁啱啱好被完美鎖住，仲散發出陣陣誘人肉香。

師傅會喺Open Kitchen為大家烹調和牛，同時灑上蘊含18種礦物質，被喻為「世界第一」，出名細膩幼滑嘅宮古島雪鹽嚟提鮮，保證原汁原味。

「沖繩雪鹽海鮮拼盤」現場即叫即燒鮮蝦、秋刀魚、多春魚、三文魚鮫等多款時令海鮮，再灑上沖繩名物雪鹽同蒜蓉嚟提鮮，令一眾海鮮更加鮮香四溢，香濃惹味得叫人難以抵抗。

「沖繩雪鹽海鮮拼盤」以最簡單常見嘅鹽烤方法，將一眾海產獨有清新鮮味完全突顯出嚟。

沖繩涼瓜三寶＋涼拌冷麵

苦瓜係沖繩名物之一，尤其夏天當造季節，沖繩人好鍾意將苦瓜做成涼拌、炒蛋、Chanpuru（炒什錦）等地道料理。今次自助餐亦有中日合壁嘅香煎沖繩阿古豬涼瓜咸蛋黃餅（熱葷）、清新爽脆嘅沖繩涼伴涼瓜（前菜沙律），同埋好特別嘅涼瓜蕎麥冷麵（主食）！低卡高纖嘅蕎麥麵係日本女生最喜愛嘅麵食首位，除咗嶄新涼瓜口味外，仲有另一沖繩三寶—紅芋口味，絕對要試！